mercoledì 28 novembre 2018

IN RENA VECIA


Walter Coderin ha pubblicato questa poesia sul sito di  "Trieste di  ieri e di oggi". Lo ringrazio per avermela fatta conoscere.

IN  RENA VECIA

Sè stufi de teatri e pantomine?
No volè più sintir stonar cantanti?
Ve fa noia veder le balarine
O de sintir zigar i comedianti?
Se volè divertirve senza pena
vignì con mi su pal pontal de Rena.
Che confusion, che ciasso, che bacani,
In teatro no xe scene più bele,
Babe, muli, putei, fioi, gati e cani
I xe tuti strucai come sardele
In casupole strete, alte un taco,
Fate de zerto soto… Marco Caco.
Per le stradele storte e fate a bissa
De continuo le babe le zavata,
I muli i ziga, i canta, i cori, i sbrissa,
I gati cori drio de qualche gata,
E su le porte babe, mame e fioi
Che lata i futuri Renarioi!
Su per la riva po che va’l convento
Xe un continuo zigar de venditori,
‘Na confusion che fa squasi spavento,
Un bestemiar che fa tremar i cori.
Babe che ziga’l loto, pegnarole
Che vendi straze a peso de parole!
Più zo xe’l sorbetier che vendi pana
E ciculata uso cafeteria,
Più in là: zuca-baruca rosta e sana
A un soldo’l toco par la mularia,
Che tuto’l giorno a colpi de bancheto
I fa saltar el soldo pal sorbeto!
Più lontan una baba meti al loto
De pedoci de mar una gran tecia;
“Boni” la ziga “par far el risoto!
Pedoci, novità par Rena Vecia!
Vardeli che bei tochi! che farsora!”
“Chi vol l’89 ch’el vien fora?”
In un canto xe i muli del sasseto
Che i gioga in sconto, par i lampareti;
Più in là tre muli soto d’un mureto
I gioga spana muro coi stecheti;
Le babe pai portoni, no se disi,
Co’ la tombola in man, le neta i bisi!
De qua, de là se senti fis’ci e canti,
Sessolote che urla come mate,
Rider, ciassar, bestemie, zighi e pianti,
Sabater de porte e colpi de zavate,
Muli che se sbarufa pal sasseto
O che scampa davanti’l lampareto!
“Gelati! Frambua, pana e ciculata!”
“Zuca-baruca” “Babe chi ga straze?”
“Limonadaaa! Oh che bona! Oh che gelada!”
“Chi ga ossi? Chi vol el zercastraze?”
Spazacamin!” “El gua” “L’ombrelajo!”
“Conzapignateeee!” “Conzacaldiereeee!”
E fra mezo sti zighi che frastona
Un gran passar de gente, un gran trambusto,
E sora tuto più forte risona
De lontan la campana de San Giusto
E a quei gran colpi che’l batocio mena,
Rimbomba l’aria e par che tremi Rena!
E in sto bordel tre babe ogni matina
I sogni le se conta e le malore
E le studia par far una zinquina,
Giogarla al loto e po diventar siore.
Ma ogni sabo, propio, par malora,
Gnanca uno no vol vignirghe fora!
Sui scuri, su le porte e pai balconi
Come se fussi un giorno de gran festa,
Se vedi biechi, tochi de paioni,
Che pica zo e i casca su la testa.
E po par tuto straze, bande e tole,
che le sta ferme o le camina sole!
Se volè schivar de qualche straza,
Che ve toca la fronte o pur la boca,
Un pàndolo ve capita o la mazza
De qualche mulo e a chi ghe toca… toca!
Andé zercarlo po, se gavè lena,
Par tute le stradele che xe in Rena!
Ma bastarà cussì! Se’ndemo ancòra
Par queste contradele e ste viuzze
Ris’ciaremo de no trovarse fora
O d’esser sofigadi da le spuze
Dei canai, dei zento scovazoni
Spalancadi in mezo dei portoni!
E là sul canton di fronte al Crocefisso
sta Angiolina col suo bel sguardo fisso.
La guarda lontan oltra’l mar zelestin
su la porta del “Bon Zitadin”.
Un aventor ziga: “Un quarto de vin!”
Ma no la lo scolta, la pensa al suo Giovanin…

1903 E. Barison

Nessun commento:

Posta un commento

Per piacere evitate i commenti anonimi